Las Hèstas de la Magdalena deu Mont que son de las mei granas de Gasconha, l’un deus moments màgers deu cicle hestiu – vertadèr rite de passatge – de las generacions joenas dab las hèstas de Baiona et de Dacs.
Qu’atraçan de cap a 100.000 hestaires, mot occitan-gascon passat au francés deu país devath la forma festayre, vestits de blu e blanc, las colors de la vila, que començan desempuish 2012 lo purmèr dimèrcs passat lo 14 de julhet e que duran 5 dias.
Aqueras hèstas que s’emparan suu culte de Senta Magdalena, dejà atestat au sègle XVIau, dont l’estatua es portada en procession de la glèisa deu medish nom dinc a la capèra de las arènas deu Plumaçon, bastidas en 1852. Que s’emparan tanben sus l’organizacion de corsas landesas (corrudas de vacas) e, desempuish un sègle, de corsas de taures (corridas) emprontadas a la tradicion espanhòla de las prumerias deu sègle XIXau.
Que s’avian suu davant de la Maison comuna on lo maire e balha las claus de la vila a la joentut deu lòc. Que son pingorladas d’ua pièla d’animacions : ua cavalcada de carris preparats peus barris e per las associacions de la vila, bals nombrós, ua hèsta heirèra e ua huec d’artifici tà acabar. Ua dia – la Hèsta deus pichons – qu’es beròi dedicada aus mainatges.