Lo dimenge suu truc de dètz òras, la missa cantada en bearnés qui retreneish de polifonia. Puish, lo cortègi de las confrairias que va de cap tà la Plaça deu Bayaà on navèths confrairs e son intronizats. L’aperitiu que segueish, puish lo disnar bearnés de 800 cobèrts animat au ritme de las bandas.
"Lo vrèspe qu’ei animat peu seguici
deus bròs tematics de Salias"
Lo vrèspe qu’ei animat peu seguici deus bròs tematics de Salias e de la Comunitat de comunas, seguit deu moment mei simbolic de la Hèsta de la Sau : l’escomesa deus portaires de semaus. Aqueste qu’arrevita lo camin millenari deus poblants qui anavan cuélher l’aiga tà la hont e qui la pausavan dens cistèrnas plaçadas devath los ostaus deus faiçonaires de sau. Ad aqueste parat la hèsta qu’arrevita los gèstes vielhs deu tiratge de l’aiga salada deus portaires de semaus - vaishèths de 120 kg un còp pleats - e de la fabricacion de la sau.
La Hèsta de la Sau de Salias, en Bearn, creada en 1980, que’s hè en quate dias la dusau setmana deu mes de seteme, deu dijaus dinc au dimenge. Desempuish 3000 ans, la sau qu’ei espleitada a Salias e nau cents tonas que i son enqüèra produsidas tot an.
"la Hèsta de la Sau qu’ei lo parat
d’amassar la familha e la comunitat sancèra"
La hèsta que hè aunor a l’aur blanc e a l’estatut especiau que balhè a la ciutat au briu deus sègles : ua produccion locau tant estimada tà har los hromatges e per las salasons deu Bearn.
Tau com las hèstas patronaus, la Hèsta de la Sau qu’ei lo parat d’amassar la familha e la comunitat sancèra ; tanben, l’ua de las hèstas màgers de l’abòr en Bearn. Bèra regaudida populara, qu’aconsia mantuns elements de la cultura bearnesa, mei que mei las pèças de teatre e lo cant.