Desempuish 1980, la Hèsta deus Aulhèrs d’Aràmits que’s hè tots ans la tresau dimenjada de seteme. Que hè seguida a la nueit deus aulhèrs, un bal qui avè lòc quauque còp a la fin de l’estiu, au moment de qui los tropèths e devaravan de las estivas.
La hèsta que marida uei lo dia encontres professionaus e culturaus en tot s’emparar sus un par de simbèus deu pastoralisme : lo mestièr d’aulhèr e lo cant.
"des rencontres professionnelles et culturelles
autour du métier de berger et du chant"
Animacions de totas que i son organizadas, tà començar, lo dijaus e lo divés : descobèrta de las riquessas de la vath (bòscs), esportivas (passejadas en VTT), mes tanben ua transumància deus còths d’estiva ençà.
Lo dimenge, ua missa qu’ei celebrada, a l’airejada, a 9h30. Qu’ei seguida d’un seguici deu tropèth d’aulhas, de danças tradicionaus, puish d’un disnar devath capitèth.
Encontres professionaus
"Un concors
de cans pastors"
Un concors de cans pastors de qui las qualitats tecnicas e son jutjadas devant haut o baish 3000 espectators, e qui compta entau campionat de França deus cans pastors. Lo succès d’aquera manifestacion que vien e, medish temps de la data causida qui guaranteish lo bèth temps e qui ei posteriora aus autes concors de cans, los mei bons que son atau descobèrts e convidats a participar. Lo dissabte matin que s’i hèn atau, a l’estadi, qualificacions puish lo dimenge vrèspe, la ceremonia d’obertura deu concors de cans seguida deu quite concors. La lenga emplegada qu’ei la deu mèste. Que’s pòt enténer los aulhèrs a mandar taus cans en la lor lenga mairana, l’occitan de Bearn. Los ordis que son dats, còps que i a, de luenh enlà, au shiulet (honha, a dreta, a esquèrra, arreviret…).
"Comici Agricòla dedicat
aus hromatges d’aulha"
Lo dissabte que i ei tanben lo Comici Agricòla dedicat aus hromatges d’aulha hèits peus neuridors de la vath. Cada lòt qu’ei hèit de 15 hromatges dab un minímum de cinc mes d’afinatge en cava. Lo public que pòt tanben gostà’us au vin d’aunor auhèrt au parat de la remesa deus prèmis tau com lo dimenge mieidia. Desempuish 2009, lo ganhant que participa au Concors generau entau Salon de l’Agricultura de París.
Encontres vocaus
"lo rendetz-vos
deus amators de cant"
Auta grana manifestacion : encontres vocaus qui son lo rendetz-vos deus amators de cant. Que’s hèn lo dissabte ser devath un capitèth on i a un empont, au parat d’un sopar d’un milierat de cobèrts e que i concorren mantuas formacions qui cantan lo repertòri tradicionau polifonic o creacions de totas dab l’estille corala.
En fin de serada, peu torn de l’estanquet, atau com l’endedia après lo concors de cans, los cantaires de la vath que s’arretròban aus cafès, en s’emparar suu repertòri polifonic tradicionau.
Cap Sud-Ouest a Aramits
Aquesta pagina que contien extrèits de la fica d'inventari deu Patrimòni Culturau Immateriau qui descriu aquera practica.
Consultar la fica d'inventari sancèra