Estetica e simbèu
Simbèu e estetisme de las esquiras e colars
Las esquiras que pòden estar ondradas en relhèu o en clòts. Los punts en relhèu que pòden dessenhar un damièr, ua letra o enqüèra ua crotz trinitària, còps que i a associada a un còr de la part envèrsa. Que son motius qui an, a l’encòp, ua foncion estetica e simbolica.
Esquiras au sègle XXI
Las esquiras que son tostemps estadas marcadas que sii per elements simbolics ancians : crotz trinitària, crotz pirenenca, o per un numèro de seria de l'enterpresa qui las fabrica. Utilizadas un còp èra entà’s diferenciar de la concurréncia, aqueras marcas que son uei de mei anar mei personalizadas, e entà aquò har, dirèctament comandadas au fabricant. Las esquiras que pòden atau estar marcadas peus aulhèrs e auheridas au parat d’eveniments especiaus com per exemple las neishenças, las batias, los maridatges o los aniversaris. Quauques uas d’aqueras esquiras qui seràn auheridas, plan ondradas, que perderàn atau la lor utilitat pastorau entà vàder objèctes decoratius.
Los canaulas / Los colars
Marcas e simbèus qu'apareishen tanben sus las canaulas, a saber los colars on son gahadas, au còth de las bèstias, las esquiras. Hèitas de husta, de plastic, o mensh sovent de cuèr, las canaulas que’s barran dab clavetas interioras, dab vitz o escroas.
Se n’i a qui son hòrt simplas, d'autas que son de vertadèras òbras d'art dab motius en relhèu e/o pintrats. Que's compausan de còrs, crotz, motius floraus, fòrmas geometricas rectangularas o rosassas. Qu’ arretrobam aqueths motius sus d’autes supòrts de hauta valor simbolica com mòbles (cròfes, vaisherèrs o bonetèras), los lintèus de las pòrtas o las renvorsuras qui capèran l’entrada de las maisons, o enfin sus instruments de musica.
Despuish quauques decadas, las decoracions o las marcas de las canaulas que's son diversificadas. Colars que pòden estar decorats dab motius pintrats o gravats de faiçon hòrt personalizada. Las rosassas e autes simbèus classics que costejan escuts, drapèus, emblèmas de clubs de rugbi, noms de personas, datas d'aniversari, referéncias au pastoralisme o a la montanha, flors…