La mesa au son
Etapa 14 /
La mesa au son d'ua esquira qu'ei l'etapa qui acaba lo procèssus de fabricacion. L'obrèr que hè en martelar l’esquira sus ua bigòrna dincà que s’audeishi un son d’ua ampla resonància acostica.
Quan los aulhèrs vienen entà crompar esquiras, que cèrcan prumèr un son qui s'acordarà dab las pèças qui an dejà.
Que i a mei d’ua faiçon d'adaptar e d'acordar la tonalitat de l’esquira. Se vòlen per exemple obtiéner ua resonància e ua amplitud sonòra importanta, los trucs de martèth que seràn portats suu haut de la pèça. Totun, se l’aulhèr vòu un son mei grèu o agut, l'acordatge que's harà sus la boca de l’esquira.
En reprodusir lo movement deu batalh, hèit per l'animau qui camina, dab lo margue deu martèth, l'obrèr que sap se lo son ei deus bons.
Los aulhèrs qu’adaptaràn lo son deu lor tropèth en foncion de l'endret on aqueste anarà pèisher. Atau que’u tornarà trobar mei aisidament. Los sons grèus de las esquiras que seràn meilèu per la montanha mentre que los sons aguts seràn meilèu per la plana o peus endrets boscassuts.