Mustra Trucs

La mesa en forma de l’esquira en tòla d'acèr

Etapa 1/ Las esquiras que son retalhadas en placas de tòlas d'acèr a l’estat brut. Dab ua premsa, que i marcan lo país d'origina e lo numèro de la pèça produsida. Que son adara ondradas d'un simbèu causit peu comanditari. Los cantèrs de la placa de metau, qui haràn la boca, que seràn en seguida bordejats a la premsa entà l'assolidar.

Etapa 2 / La pèça de metau qu'ei plegada sus ua bigòrna adaptada a la talha de l’esquira entà que los dus caps las se juntin. L’esquira que pren la soa fòrma dab lo martelatge : duas aurelhas que pareishen alavetz suu haut de l’esquira.

Etapa 3/ La boca e los cantèrs de l’esquira que son sodats dab ua sodadera a punts.

Etapa 4 / A l'interior de l’esquira que van hornir un cròc aperat « meliguèra » on gaharàn lo batalh, au dehens deu còs de l’esquira.

Etapa 5 / Que cau arreplegar las aurelhas entà poder gahar l'ansa, e ua sodura que vien assolidar lo tot. Lo façonatge de l’esquira qu'ei acabat.

Etapa 6 / L’esquira qu’ei troçada hens papèr jornau dab trocicòts de laton (aliatge de coire e de zinc) saupicats per dessús entà que's haci, un còp l’esquira metuda a còser, lo famós brasatge.

Etapa 7/ Ua pèth d'argèla que va troçar lo tot, e un clòt (chemenèia) qu'ei hèit suu costat deu pan.

Etapa 8/ Los pans d'argèla que son deishats en ua pèça cauhada a 100° entà har partir l'aiga contienguda hens l'argèla. Non caleré pas que l’umiditat estossi en contact dab lo metau de l’esquira.