La simbolica de las esquiras
Un objècte pastorau marcaire deu temps :
Un son d'ambient au briu de las sasons
Las esquiras que son un deus grans marcaires sonòres deus territòris pastoraus. Los tropèths d’aulhas « esquirats » qui van taus camps un dia de beròi temps d'ivèrn e qui tornan lo ser, que dan l'òra. Un tropèth qui peish tranquillament que hè audir ua musiqueta qui hè partida de l’ambient quotidian. Aqueths sons que càmbian en foncion de las sasons e de las activitats pastoraus, l'ivèrn esquiretas, picons o clarinas, deus sons aguts e luenhècs, l'estiu esquiras, trucons e metaus de las tonalitats mei grèvas e hòrtas.
Un son deus temps hòrts : l’estivatge
Las transumàncias que son moments deus hòrts qui ritman l'annada deus aulhèrs e de las comunautats montanhòus. Que crèan ua emocion particulara qui ei pròpia a cadun e qui neish au son deus tropèths esquirats, dab las esquiras de rota qui’s juntan a las autas e que dan un son mei grèu, potent, creator d’ua emocion qui s’apodèra de tot cadun. Qu'ei d'autant mei important entaus aulhèrs qui s'expausan a la vista deus autes, que dan la mustra de çò qui son. Qu'ei alavetz ua question de fiertat e de dignitat de paréisher e de soar plan ! Se i a un dòu en la familha, l’aulhèr n’esquirerà pas ; l’emocion que serà de las hòrtas quan lo monde vedin a passar lo son tropèth silenciós.
Un objècte pastorau afectiu :
Portaire de memòria
Las esquiras que pòden representar un eretatge preciosament conservat. Que las eretan per quauques uns deus davancèrs, deus ajòus qui èran aulhèrs ; per d'autes qu'ei un present hèit au parat d’un eveniment especiau. Dens los dus cas, que materializan la memòria de gents e moments importants de la vita. Quan la persona serà pas mei dens l’eslhevatge, las esquiras que's guardan e que's mòstran aus visitaires de passatge.
Passion e colleccion
« B'ei empeguit d’esquiras ! » N'ei pas rare d'audir aquera remarca en parlant d'un passionat. Que sian aulhèrs, hilhs d'ua familha d'aulhèrs, o sonque monde qui viven suu territòri, òm pòt rencontrar passionats colleccionaires d’esquiras. A cadun lo lor interès, lo son, l'estetisme o la lor ancianetat reperabla peu lor procediment de fabricacion, los colleccionaires que son a la recèrca de las pèças raras.
Emblematic
Aqueth interès entà las esquiras que despassa lo lor simple usatge pastorau . Que vad un marcader identitari tindaire e visuau. Las esquiras que son tant indissociablas deu pastoralisme qui son presentas a l'entorn deu còth de las vacas deu drapèu de Bearn e nombre d’escuts de comunas e territòris.
