Desempuish 2005, cada dusau quinzea d’aost, Hestiv’Òc que lauda la lenga e la cultura occitanas e que convida las culturas deu Sud a s’encontrar a Pau, capdulh deu Bearn. Aquera manifestacion màger de l’estiu biarnés que tira de cap au hestau e a la hèsta patronau. Hestiv’Òc qu’ei atau vadut, uei lo dia « las hèstas de Pau ».
Tau com los hestaus o las granas hèstas gasconas de Baiona, de Dacs, deu Mont, un hèish d’animacions que i son programadas : concèrts, arts e musicas de carrèras, cinèma, literatura, dança, teatre, espòrts tradicionaus…
La gastronomia qu’ei tanben aunorada, estanguets que son installats plaça Rejau, tà har vàler los produits de Bearn e Gasconha.
"la horrèra amassada tà ua cantèra giganta (mei de 4000 personas),
que hè bronir las cantas mei conegudas deu repertòri"
Çò de hestiu e donc de rituau que i ei tanben mei que mei lo dijaus, dia de l’obertura de Hestiv’Òc, plaça Rejau. Deu balcon de la Maison comuna estant, Dauna la maira entornejada deus pairins de l’an, qu’obreish oficiaument las hèstas. Au pè deu balcon, la horrèra amassada tà ua cantèra giganta (mei de 4000 personas), que hè bronir las cantas mei conegudas deu repertòri, imnes de Pau e deu Bearn : Beth cèu de Pau, Aqueras montanhas e l’Immortèla.
La tienguda tradicionau deu hestau : blanc en haut, nere o burèu en baish, mes sustot lo famós carrat jaune.
