A Lescar, purmèr capdulh de Bearn e sedença de l’ancian avescat, lo Huec de Sent Jan qu’ei organizat, tots ans, lo 23 de junh au ser. De 1999 enlà, l’associacion l’Esquireta que s’i voló tornar dab ua practica atestada de longa man hens la ciutat, e pro plan descriuta peu folclorista e felibre Norbert Rosapelly.
Un concèrt a la Catedrau o a la gaudina deu Lescórrer qu’avia en generau la serada, puish, de cap a 20h, que s’i dança los sauts e branlos bearnés davant deu Pati de la Catedrau on un vin d’aunor ei auhèrt per la municipalitat. Un gran sopar popular que s’ensegueish, sus la plaça de l’Avescat, on tots e’s pòden har seguir de qué clacar, o horní’s de grasilhadas servidas per l’escòla Calandreta de Lescar.
Qu’ei a 22h que’s lança lo passacarrèra cantat, miat au son deus vriolons e de las flabutas/tamborin, illuminat d’ua troperada de flambèus. Tots que s’encaminan de cap tà la gaudina deu Lescórrer on s’i quilha la halha.
